पुरातन कोटेश्वर मंदिर &#8211; Video

पुरातन कोटेश्वर मंदिर :

बारा मोटेच्या विहिरीमुळे प्रसिद्ध असलेले लिंब गाव. या गावाची अजून एक खासियत म्हणजे कृष्णा नदीच्या पात्रातील कातळावर असलेले पुरातन असे कोटेश्वर महादेव मंदिर.

नदीवर असलेल्या छोट्या पुलावरून आपण थेट मंदिर परिसरात येऊ शकतो. मंदिर परिसरात प्रवेश केल्यावर डाव्या हाताला असलेल्या छोट्याशा देवळीत श्री गणपतीची चतुर्भुज मूर्ती आहे.

थोडे पुढे गेल्यावर पत्रे घातलेल्या उघड्या सभागृहात एका पुरातन वृक्षाचा दगडी बांधणीचा गोलाकार पार दिसून येतो. त्याला लागूनच श्री कोटेश्वराचे देऊळ आहे. समोरच काळ्या पाषाणातील नंदी शिल्प आहे.

गाभाऱ्यात भव्य अशी शिवपिंडी आहे. त्रिपुरी पौर्णिमा, महाशिवरात्री आणि श्रावणी सोमवारी दर्शनासाठी भाविकांची गर्दी येथे होत असते. पूर्वाभिमुख असलेल्या मंदिराच्या भक्कम दगडी प्रवेशद्वारा समोर नदीपात्राच्या जवळच दोन कुंड असून नदीच्या पाण्याचा ओघ प्रवाहित करण्यात आल्याने ही कुंड पाण्याने भरलेली असतात. एका कुंडात छोटीशी शिवपिंडी आणि नंदी शिल्प दिसून येते.

थोडे पुढे एका कोनाड्यात थोडी जीर्ण अवस्थेत असलेली छोटी महाबली हनुमानाची मूर्ती आहे. अतिशय पुरातन मंदिर परिसरात एक दगडी सहाण, तुळशी वृंदावन आणि दोन तीन वीरगळ दिसून येतात. आम्ही ज्या वेळी चित्रीकरणासाठी या ठिकाणी पोहोचलो त्या वेळी जिर्णोद्धारासाठी मंदिर बंद असल्याने चित्रकारणावर मर्यादा आल्या.