प्रयोगात्मक कलेच्या माध्यमातून महाराणी ताराराणी यांच्या जीवन चरित्राचे सादरीकरण
मुंबई | महाराणी ताराराणी यांच्या ३५० व्या जन्म वर्षानिमित्त सांस्कृतिक कार्य संचालनालयाकडून विविध उपक्रमांचे आयोजन केले आहे. महाराणी ताराराणी यांच्या जीवन चरित्रावर आधारित एका भव्य सांस्कृतिक कार्यक्रमाचे आयोजन मुंबई येथे केले आहे. तसेच जीवन चरित्रावर आधारित भव्य चित्ररथाद्वारे अहिल्यानगर जिल्ह्यात प्रदर्शन केले जाणार आहे. त्यांच्या जीवन कार्यावर आधारित विद्वत्त परिषदेचे आयोजन कोल्हापूर विद्यापीठामध्ये करण्यात येणार आहे.
महाराणी ताराराणी यांच्या ३५० व्या जन्म वर्षाचा भाग म्हणून महाराष्ट्राच्या सहा महसुली विभागात भव्य सांस्कृतिक होणार आहेत. या सांस्कृतिक कार्यक्रमातून प्रयोगात्मक कलेच्या माध्यमातून महाराणी ताराराणी यांच्या जीवन चरित्राचे सादरीकरण जनसामान्यांसाठी करण्यात येणार आहे. त्यामुळे तरुण पिढीला प्रेरणा मिळेल.
या कार्यक्रमाची संकल्पना सांस्कृतिक कार्य मंत्री सुधीर मुनगंटीवार यांची असून मुख्यमंत्र्यांचे अपर मुख्य सचिव तथा सांस्कृतिक कार्य विभागाचे अपर मुख्य सचिव विकास खारगे यांच्या मार्गदर्शनातून राज्यातील विविध ठिकाणी उपक्रम होतील.
सहा महसुली विभागापैकी मुंबई विभागातील सांस्कृतिक कार्यक्रमाचे यशवंत नाट्यमंदिर, माटुंगा या ठिकाणी आज सायंकाळी आयोजन करण्यात आले होते, या कार्यक्रमाला सांस्कृतिक कार्य संचालनालयाचे सहसंचालक श्रीराम पांडे, सहाय्यक संचालक संदिप बलखंडे तसेच ज्येष्ठ अभिनेते सुशांत शेलार यांच्या उपस्थितीत हा कार्यक्रम संपन्न झाला. रसिक प्रेक्षकांनी या कार्यक्रमास भरभरून उपस्थिती लावली.
