रायगड जिल्ह्यातील नांदगाव- दांडा येथे पर्यटन उद्योगांवर आधारित कार्यशाळा संपन्न

एमटीडीसी, DoT चे कार्य, कृषि पर्यटन योजना , पर्यटनास औद्योगिक दर्जा , Adventure Tourism Policy, पर्यटन धोरण 2016 याबद्दल श्री हनुमंत हेडे यांचे उपस्थितांना मार्गदर्शन

पर्यटन कार्यशाळेत हॉटेल व्यवसायिक, होम स्टे धारक, रिसॉर्ट व्यवसायिक आणि कृषी पर्यटन व्यावसायिकांचा उत्स्फूर्त प्रतिसाद

रायगड प्रतिनिधी | नांदगाव बीच परिसरात कार्यरत असलेले हॉटेल व्यवसायिक ,होमस्टे, कृषी पर्यटन धारक आणि रिसॉर्ट व्यवसायिक यांच्यासाठी पर्यटनावर आधारित कार्यशाळा नांदगाव बीच संस्था आणि पर्यटन संचालनालय (DoT) कोकण विभाग नवी मुंबई यांच्या संयुक्त विद्यमाने रायगड जिल्ह्यातील नांदगाव- दांडा येथील कंदील रिसॉर्ट येथे आयोजीत करण्यात आली होती. या पर्यटन कार्यशाळेत जवळपास 38 हॉटेल व्यवसायिक, होम स्टे धारक, रिसॉर्ट व्यवसायिक आणि कृषी पर्यटन व्यवसायिक उपस्थित होते.

या पर्यटन उद्योग कार्यशाळेत मार्गदर्शन करण्यासाठी श्री हनुमंत हेडे उपसंचालक ( पर्यटन) कोकण विभाग नवी मुंबई, श्री संजय नाईक संचालक निसर्ग पर्यटन , डॉ. संतोष कामेरकर बिजनेस कोच व आंतरराष्ट्रीय प्रशिक्षक, श्री महेश मापगवकर अध्यक्ष नांदगाव बीच संस्था, श्री स्वप्नील चव्हाण उपाध्यक्ष नांदगाव बीच संस्था, श्री तुषार दिवेकर सचिव नांदगाव बीच संस्था आणि श्री निमेश परब अलिबाग कृषी पर्यटन विकास संस्था, श्रीमती संगीता कळसकर, इंडोलॉजी प्रशिक्षक पुणे आणि सौ श्वेता नाईक संचालिका निसर्ग पर्यटन इत्यादि मान्यवर उपस्थित होते.

या कार्यशाळेत श्री हनुमंत हेडे यांनी एमटीडीसी, DoT चे कार्य आणि शासनाने जाहीर केलेली योजना उदा. कृषि पर्यटन योजना , पर्यटनास औद्योगिक दर्जा , Adventure Tourism Policy, पर्यटन धोरण 2016 याबद्दल माहिती देण्यात आली. श्री हनुमंत हेडे यांनी पर्यटन मध्ये आदरतिथ्यचे महत्व, हॉटेल मधील रूम्सची स्वच्छ्ता , किचन स्वच्छ्ता आणि अनुभवजण्य पर्यटन यावरही मार्गदर्शन केले तसेच उपस्थितांच्या प्रश्नांचे व शंकांचे निरसन केले.

श्री डॉ. संतोष कामेरकर यांनी उद्योजकीय मानसिकतेबद्दल उपस्थित उद्योजकांना मार्गदर्शन केले, त्याचप्रमाणे उद्योजकांनी शिकत राहणे खूप गरजेचे आहे. शिकल्यामुळे आपल्याला आणखीन नवीन नवीन गोष्टी अमलात आणता येतात त्याच बरोबर इतरांच्या व्यवसायामध्ये आपण जाऊन डोकावून बघितलं तर तो कोणत्या प्रकारे नवीन उपक्रम , संकल्पना राबवतोय, त्याबद्दल माहिती मिळते अशी सविस्तर माहिती देऊन मार्गदर्शन केले.

उद्योजकांनी कायम शिकत राहिले तर फायदा मिळतो हे वारंवार श्री संतोष कामेरकर यांनी सांगितलं. श्री संतोष कामेरकर म्हणाले की, आपल्याला माहित नाही अशा अनेक गोष्टी जगामध्ये आहेत ज्याची आपण कल्पनाच करू शकत नाही त्याचबरोबर लोकांनी एकमेकाला मदत केली पाहिजे, सहकार्य केले पाहिजे असे ही सांगितले . तसेच श्री संजय नाईक यांनी मार्गदर्शन करताना म्हणाले की पर्यटक आकर्षित करण्यासाठी सहल आयोजकांचे मार्गदर्शन घेणे गरजेचे आहे असे ते या कार्यक्रमात मार्गदर्शन करताना म्हणाले.